Առինջ համայնքը գտնվում է Կոտայքի մարզում, սահմանակից է Երևան քաղաքի երեք թաղային համայնքներին և մարզի երեք գյուղերի վարչական տարածքներին:Գտնվում է մարզկենտրոնից՝ 40 կմ, մայրաքաղաք Երևանից 8 կմ հեռավորության վրա: Այստեղով է անցնում Երևան-Սևան մայրուղին:  Համայնքի վարչական տարածքը կազմում է 1042,39հա, բարձրությունը ծովի մակերևույթից՝ 1150մ: Գյուղի աշխարհագրական դիրքը նախալեռնային է, կլիմայական պայմանները՝բարեխառն, տարեկան տեղումների քանակը 250-ից 350մմ-ի սահմաններում է, վերջին տարիներին նկատվում է տևական ձնածածկույթի սակավություն և կարկտահարություն:

Վաղբրոնզեդարյան հնագիտական գտածոների գոյությունը վկայում է, որ բնակավայրը հիմնադրվել է մ.թ.ա. 3-րդ հազարամյակում: Գյուղը պատմական աղբյուրներում հիշատակվում է 5-րդ դարից սկսած: Հին ու միջին դարերում տարածքը եղել է Մեծ Հայքի Այրարատ Նահանգի Կոտայքի գավառում՝արքունի սեփականություն: Գյուղի մոտ, Թիկնացբլրի վրա, պահպանվել են հին բերդի մնացորդներ: Բերդապարսպի ստորին շարքերը մեծ մասամբ անտաշ քարերով են, մուտքի մասում՝կոփածո սրբատաշ։